Cabdi Iidaan Faarax Nuur

Dadku inuu samraan moodayee waa sidii weliye
Saaciisu nimuu buuxsamoo sahayda loo qaaday
Inuu socodka hore raacayaa waa sal la hubaaye
Nafta saacad iyo wiig ka hadhay loo sal-dhigi waaye
Saqda dhexe Siyaaxay haddii weerar lagu saydhay
Siddeed kadin haddii lala tagooy siigo kor u duusho
Sargedaha haddii lagala dhacay sararta guudkeeda
Markay gabanta yari saydhantay eddegga siiceysey
Suubeey raggii maali jirey soo sawaxan yeedhye
Saqla orodka goortaa qalbigu naga silloonaaye
Maarraha sannaadhiyo kolkuu sumucu qiiqaabay
Ee siidhigii nala dalbaday sawjar nala moodye
Goortaad suldaankii disheen Sugulle Caynaanshe
Ayaad sun iyo waabeeyadii sare u laacdeene
Sarhayaa ban kugu duudsiyiyo sulubkii dheeraaye
Sinji iyo ab baa nagu ogaa sabada mayd yaalle
Sibreheeda waa oolli jirey soobir qaawaniye
Meeshii saqaafkeedu maro sababi waa taale
Sooryeyney haadkii suddee soommanaan jiraye
Waa kaa waraabii sorkokay saabka buuxsadaye
Sagaalleyda nimankii ku baray sebenka Jiilaalka
Reer Samatar baa Saylac iyo surinka kuu yiille
Daraan lagu suduudeenba way naga sokeeyeene
Sakaaraysataa iyo surtiyo sabaqa ruugtaanba
Saqafaa qortaa iyo okhole suura gadataaba
Sannad baad ku noolaan kartaan sulufka caydheede
Soddonkii fandhaal baad la iman Saaxil waa nabad’e
Wax kaloo safeeyaa ma jiro sadarka feedhaaye
Annaga soortu nama kaafidiyo subagga
Dhiin waale Sangaraaraceeduu qalbigu saakin noo yahaye
Waa sahanka geerida hadday olosho Suudaane
Bagaa lagu sardamay qaalmahaa noo sonkor ahaaye

Rag Sabaan ka Sabaan baan Salaantow badiyaa
Hadduu saakimi waayona Sariir baan u goglaayoon Iska seexo idhaa
Hadduu saakimi waayona Caanahii hasha Suubbaan baaan
Saddex jeer u lisaayoo Ku sarriigo idhaa
Hadduu saakimi waayona Summalkii rugta joogiyo Sogobkaan u qalaa
Hadduu saakimi waayona Sarreenkii Cadameed baan Sixinkowgu badshaa
Hadduu saakimi waayona Gabadh suurad wanaagsan baan Surrad’owga dhisaa
Hadduu saakimi waayona Xoolo gooni u soofiyo Sadadaan ku ladhaa
Hadduu saakimi waayona Seeddoow Mood iyo Mood iyo Salaantaan badiyaa
Hadduu saakimi waayona Salaaddaan lallabaayoo
Maydal seedo madow iyo Safkii aan ka dhashiyo Salligaan cuskadaayoo
Sulub eebo ku joogtaan Sarartaa ku dhuftaayoo
Sanbabkaan ka baxshaayoo Markaasuu sallimaa

Abwaanku gabaygan waxa uu tiriyey 26 Juun 1960 habeenkii ay Soomaaliya xorriyadda ka qaadanaysey gumaysigii Ingiriiska. Waxa uu ka tiriyey Beerta Xorriyadda ee Hargeysa oo calanka lagu saarayey.

Waayadanba gabaygii ma odhan idibilkiisiiye
Ma aloosin maansooyinkii aan aaladayn jiraye
Waatii aan albaabada u xidhay tan iyo Iidiiye
Amin dhexe xalay uun bay hurdada ina ka muuqdeene
Aan alooso maantoo kalaaan ku istihaadaaye
Kolbaba wixii Ilaahay kuu gartaad ku intifaacdaaye
Abaal kaa maqnaan jiray hadduu Eebo kuu celiyo
Amaah raagtay dabadeed haddii aadyar lagu siiyo
Alxabdulilaah waa kuu banaan inaad odhaahdaaye

Istiqlaalka nala siiyey iyo amarka lay dhiibay
Afrikada xorawday iyo nasriga uunka wada gaadhay
Amin qaybta fiidka iyo saqdiyo oogta waaberiga
Iridaan ka meeraba kolkaan ku arko guudkayga
Inaan anigu keligay helay ila ahaataaye
Ayaan kaa lakala roon yihiyo ubudka xoolaaye
Inagaa aleylehe ka dhigan awliyoo kale’e
Inkastaba haddii lagu noqdoo abid la raacdeeyo
Ayaan inoola mid ah waa waxaan odeyna sheegayne
Axadii iyo Jimcii baan ninkii jirey ilaaabeyne
Arsaaqdii la raacdaynayey iyo waxaynu eegeynay
Inta badan hashii lagu dabcay ee awrka loo tu’iyey
Afarta iyo hashii toban bilood inanku raacaayey
Aloos curatay Soomaaliyey idil ahaanteene
Irmaanaatay Maandeeq haddii aad iman lahaydeene
Afarta naas waa hoorayaan sida iliileede
Aagaamihiyo dhiilashaan aad u culanayney
Ka ammuuga waataa muddaba umalsanaydeene
Afartaana waxuun lama eryee maysu wada eegay
Ma asteeyey beyd gaabku waa kala ilaabaaye
Sidii ilo biyalahoo rogmaday ma u eekeysiiyey
Anbaqaadka hadal runta u eeg baa lagu asiibaaye
Argagixiso waan tirin jiree erey yar baan baanay
Adduunkii ka kala qaadi jirey lays ammaan geliye
Isku darada soomaalidaan ku istareexaaye
Dadkeenii la kala oodi jirey wada akhwaanawye
Abtirsiintii tuurnay iyo aano reer hebele
Sidii geel abaar kala firdhaday laysu soo ololye
Ardayna macallinkii wax u dhigay aabo waw yahaye
Abaal baanu marin kii xornimo noo abaabulaye
Rabiyaw noo adkee calanku waa ururin doonaaye

Ilaahaan baahannee loo baahanyow Boqorkayow Hee Dheh
Ilaaha weligi baaqiga noqdoow Boqorkayoow Hee Dheh
Iaaha Deeqsinnimo loo baxshoow Boqorkayoow Hee Dheh

Ilaahi Waaxidnimo loo bartoow Boqorkayoow Hee Dheh
Ilaahaan xaq lagu beeninnoow Boqorkayoow Hee Dheh
Ilaaha dunida baaraxa khalqoow Boqorkayoow Hee Dheh

Ilaahii inu burburin sheegayoow Boqorkayoow Hee Dheh
Bini'Aadmi waa meel sokee Boqorkayoow Hee Dheh
Bismillaahi waa culustahee Boqorkayoow Hee Dheh

Ilaahii Dartii lagu beryoow Boqorkayoow Hee Dheh
Kolka Bacadka yoomkiyo la tago belel Qiyaamaa
Ninkastoo Badraanihi markuu biidna tari waayo
Ilaaha Xukunka keligii bogtoow Boqorkayoow Hee Dheh

Bar Janno iyo Cadaabtuu khalqiga ugu bushaareeyey
Badhba meelu geeyoba markuu kala boqoolsiiyo
Ilaahii laba u kala baydhiyoow Boqorkayoow Hee Dheh

Bidhaantii kastaba kii arkoow Boqorkayoow Hee Dheh
Bad wax mara berriga waxa jiriyo buuro dabadooda
In bogliyo in baabaca dhigtiyo baalka lagu duulo
Bushimo nool Allaha quudiyoow Boqorkayoow Heedhe

Biyo Oday intuu iga khalqiyo biliq yaroo Dhiiga
Bilcan Dumara uurkeed intuu igu barwaaqeeyey
Barna aniga oon qabin isagaan igu bukaysiinnin
Ilaaha Nolosha igu soo baxshoow Boqorkayoow Hee Dheh

Baabaca addoon baan dhigtee Boqorkayoow Heedhe
Boqolkaaga magac ee mid la' yaan baaqa maqashiinne
Allow xadhiga sahal iiga bixi kuu baryootamaye