Calanyahw Kumaa Tahay?

Calan yahaw kumaad tahay
Ciirsigaagu waa kee
Cudud aad ku faantiyo
Colka qaar la diririyo
Miyaad ciidan leedahay?

Bulsho aad ku culus tahay
Miyay kugu cawaysaa
Ma cir kaad u hoyataa
Dhulka cidhif ma leedahay?

Cawo qabe miyaad tahay
Mise ceel dunshaad tahay
Cilin iyo mid aayo leh
Labadaa car kee tahay?

Caku daadu badataye
Bal caddee warkaagoo
Calan yahaw kumaad tahay?

Caloolyawga maansada
Haddaad curisay inan yahay
Waydiimaha cajiibka leh
Aniguna ciraab fudud
Aan kaga hal celiyee
Magacaygu waa caan
Cimrigaan ku gaadhsiin
Anoo caadda marayee
Waxaan ahay cawaalaha
Cirka loogu magac daray!

Waagaan cusboonaa
Cisi iyo karaamiyo
Carfi baan lahaan jirey
Casrigani hayeeshee
Cidna ima daryeeshoo
Waxa aan qabaa ciil
Dushaydaa colaad iyo
Cadho lagu galaa badan
Cabashaan tirsanayaa

Walow aan caddilanahay
Ma car jabin hankayguye
Samir baan cuskanayaa

Waxba yaan cataabine
Cishadaydi baa iman
Sharaftaydi baa curan
Waxa soo rogaal celin
Maalmii cuddoonaa

Anay caalam koo idil
Badahaa cammiran iyo
Carradayda wada iman
Cirka sare ayaan tegi

Cagta kii ijiidee
I curyaanshay waa hore
Curadkiisi baa iman
Oo caddaalad ila raba

Kuwa maanta caasiyo
Igu sheegay caamana
Barray ii ciyaar tumi.

Share on facebook
Share on twitter
Share on print
Share on email
Calan yahaw kumaad tahay Ciirsigaagu waa kee Cudud aad ku faantiyo Colka qaar la diririyo Miyaad ciidan leedahay?

Raadi