Mitid Fara Yar

Marka hore ma maagee dadkaan wada murwaadaaye
Marse hadday macaan iyo tollimo muuno kala waydo
Ay murugto xaajadu nimaan maarsan baan ahaye
Maadhiinka goortaan cuskado fule madhoodhowye
Muuqayga goortuu arkuu madaxa laabaaye
Miyirkayga anigoo qabaan magane toogtaaye
Anigoo makalay buu tukuhu muruqyo goostaaye
Halkaasaan maryaha kaga furtaa miilo-gaabyada’e
Minawaar shixnadan oo dagaal lagu malaynaayo
Madaafiicda oo loo calaqoo macallinkii joogo
Mid yar oo muquuraaya baa meel ka dhaawaca’e
Mawjaduhu markaasay liqaan mood wuxuu sidaye
Maroodiga mas laayaana baa maaga oo dila e
Miciyaha libaaxba halyey wow mashxaradaaye
Midh kabriidi meel lagu qabtuu murux ka yeelaaye
Mitid fara yar midhihii bataa kama macaashaane
Kol hadday mishiinnadu qarxaan mawdka loo simane
Ismaroorintaa Reer Wacays mahadin maayaane

Share on facebook
Share on twitter
Share on print
Share on email

Raadi