Maxamed Xaashi Dhamac ‘Gaariye’

Share on facebook
Share on twitter
Share on print
Share on email

All poems by Maxamed Xaashi Dhamac ‘Gaariye’

Garaad-Daran

Garaad-daran naftaydaay!
Geeri iyo nololeey!
Guluf lagu negaadaay!
Gabno laga dhergaayeey!
Gabbal dumay habeenoo
Hadh gadiidan yahayeey!
Lammaan aan is-geyinoo
Guri qudh ah u hooydaay!
Googgaada xaajada
Gaaxdeedu waxay tahay,
Maan garan xogtaadee,
Maxaad uga gol leedahay?

Ma wax gaar ah baad too
Goonidiisa jira oo
Garab aan u baahnayn?
Mise gobol dad-weynaha
Ka go'aynnin baad tahay?
Maadigaa ah Gaarriye?
Mise laba gudboonoo
Is-geleynin baad tiin?
Gurrac-loo-abuuryeey,
Bal geddaada ii sheeg.
Garaad-daran naftaydaay!
Gurey iyo cadceedaha
Isku gedo miyaad tiin?
Gacal miyaad wadaagtaan?
Bal Giriig warkiisiyo
Guutadii Fircoon iyo
Waxa boqor la gawracay,
Ama aad gariir iyo
Guri ba'ay u taagnayd,
Googoos u mariyoo;
Giddi waaxyahaygiyo
U galaydh xubnaha oo;
Midba gees u taagoo
Ka gur sheekadoodoo;
Malaayiin gu' oo tegey
Ku dheh gebaggebeeyoo;
Geeddigoodi dheeraa
Mid kastaa guduudiga,
Halkay galabba joogtiyo
Goorteey kulmeenee
Gaarriye sameeyeen,
Godolkeeda ii mari.
Garaad-daran naftaydaay!
Sida gacanka Waaheen
Hadba gaaf-wareegaay!
Arrin aad gorfeysiyo
Waxaad shalay u guuxdaad,
Maantana ka giigtaa
Gol-daloolo yeeshee;
Miyaad dhalan-geddoontoo
Dib bay kuu gardaadsheen?
Ma runtaa gaboowdoo
Geedkeedu waareyn?
Guul-darradu dhankay tahay?
Guud ahaan waxaad tahay
Dadku kugu go'doonyoo
Isla waa go'aanoo,
Mid baad geesi adagoo
Gabbanayn la tahayoo;
Maan-gaab lumaayiyo
Mid baa ceel ganuuniyo
Kuu haysta gocoroo;
Mid baa kugu goblama oo
Gurxankiisu damihayn
Haddii saxar ku gaadhoo;
Gaadaa wax boobiyo
Mid baad good la tahayoo;
Mid baad garab laxaadliyo
Ruux guda abaaloo,
Loo galo wanaag iyo
Gaashaan la tahayoo;
Garaadlaay xogtaadii
Cidi gaadhi waydee
Dadkan kugu gabaabsiyey
Kumaa helay guntaadoo
Gacan-qaad la siiyaa?
Miyey gabi habaabeen?
Maadigaa wax gabayoo
Hadba geed is-mariyoo,
Goobba midab la joogoo
Gallibaxa habeenkii?
Garaad-daran naftaydaay!
In kastoon gucleeyoo,
Garmaamada haldhaagiyo
Gammaankaba ka jiitoo
Cirka sare galaa-baxo,
Adigay la gooshoo
Iga gaabinaynoo,
Goobtaan is-taagaba
Adigaa galluubane,
Ma gashaygu baaqdoo
Lagu yidhi ka soo goo?
Mise gaari inan oo
Guur-u-meer ah baad tahay?
Maxaad gama' u diiddee
Iga daba-gureysaa?
Dambiyaal waxaan galo
Ama geysto fool-xumo,
Gabigoodba ceebaha
Aan gaar u leeyahay,
In kastoon is-giijoo
Weji kale gashada oo
Dadka been ku gaasiro,
Adigaa giraanoo
Gunta iimahaygoo,
Hoos ii guhaadshee;
Godobtiyo xumaantada
Inaad tahay ninkeed-gaba,
Maxaad iigu garataa?

Garaad-daran naftaydaay!
Gumaysaad ku nooshoo
Dadkaa kugu garaacdoo,
Guddoonkooda mooyee
Kaa gareysan maayaan
Waxad adigu goysee;
Maad galabsan hawlaha
Kugu gaardiyaayee,
Galbiskii adoogaa
Goco oo ilmeeyoo,
Hooyadaa u goohoo
Galabtay ku dihatiyo
Eerso uur-galkaagii

Mandheela

Gabay-yahaw i maqal;
Madax-yahaw rimmani
Jiiftada madiix;
Masafooy gadood;
Maax-yahay ha gudhin.
Inta uu mudduci
Madal-weyne yimi,
Wax kastuu marsado
Marlay kiiska qabo;
Oo maddaacalii
Maanshaa allee,
Garta madax ka yahay
Ka markhaati yahay
Sharcigana matalo,
Madfac-yahaw ha damin;
Mujrim-yahaw ha ladin;
Maskax-yahay godlani
Maansada ha dayn.
Qalin-yahaw mindiyo
Ii noqo maddane;
Ku marriimo dhiig;
Kuna maydho ciin.
Khadkan hoo murka ah;
Kii macallinka ah
Ee midab-caska ah.
Ku dhig heestan milil;
Maaleey qadhaadh
Dacar lagu margado.
Maarrahaan sitiyo
Kalaashkoofka mudan,
Midig aad tartide
"Madad" baan ku idhi.
Maska ubadka jaray
Dhiiggana ku mamay
Ila moora-duug.
Murti iyo higgaad
Maxlal aan ku dhalan,
Ninna macasha qaban
Waa meeqa odhan,
Ku macsuun tix aan
Maamuus ku ladhay,
Maandheela iyo
Muudaaga xumi
Dad wuxuu makalay;
Ama reer muskood
Kaga dhigay maxbuus.
Afartaa miscirir
Mus-duleed u daa;
Mid kaleeto waa
"Maqaleey war-laay
Ma laguu warramay?"
Waxaan ahay madluun
Godobtiisa maqan,
U maleegan oo
"Maya" yidhi dulliga
Waan miigganahay;
Nin mannaagayoo
Macaluul darteed
Milgo-beelayoo,
Maalkiisa dhacan
Marti inu ku yahay
La marsiinayiyo,
Mana ihi miskiin
Ninna muuno iyo
Naxariis ka mudan.
Nacas muruq is-biday
Markuu dhabanka bidix
Farba meel ku dhigo,
Sidii Nabi Masiix
Dhanka midig u dhiib,
Mawd baan ka xigay.
Ninka midho-yariyo
Madi garab lahayn
Ii malaynayiyo,
Muska tiidsanee
Igu meersanee
Madaw iyo cadba leh,
Een mawqifkiyo
Mitidkaanu nahay
Ku midaysan nahay,
Kala maan ahaa.
Uurkayga madhan
Muruqyada i fagan,
Murugada naftiyo
Dabarkaygu maran,
Mucsurkaan qabaa,
Waa miino iyo
Meleg aasanoo,
Mar inay qarxaan
Ku muddaysanoo,
Wixii lay marshiyo
Waxan maaganahay
Kala maan ahaa.
Maanshee la yidhi
Xaaqinkaa murxee
Dhul madhaa ma jiro.
Miciyihi darraa
Ee igu mudnaa,
Mariidkiyo suntii
Maaradoodi helay.
Haddaan maahsanaa
Miyir-doorsanaa,
Miiraabay oo
Mugga waan il-baxay.
Majaraan hayaa
Duul hore u maray
Ay mahadiyeen.
Afartaa mullaax
Uga maydhax-diir,
Mid kaleeto waa
Hadal waa murtiye
Maqal Abu-hadroow.
Tixdu waa mag-dheba;
Nin kastoo mitida
Oo madiidin neceb,
Waa madhax u yaal.
Waa muuno iyo
Taallo aan u muday,
Maandheela iyo
Cidda uu matalo;
Magli baan ku qoray.
Adna Maxamadoow
Maansadu nin geya
Kama maarantee,
Mayalkeeda qabo.
Gumaystaha ku maag.
Madaxoo la rogo
Iyo midab-takoor,
Inaynaan mareeg
Marna qaadanayn,
Ninka mooggan iyo
Macal-cune dhacsii.
Miliqsade ka nixi.
Hal-muceedyadii
Mari aad tiqiin;
Oo mahadho iyo
Maahmaah ka reeb.
Kana marag ahaw
Rag hadday murmaan,
Mabda'eenu waa
Isagoon mugdiyo
Madmadoow ku jirin,
Maantiyo berriba
Malafsade ha dhaco;
Xalaal-maal ha jiro;
Dadku waa masee
Ha mudh-baxo cadligu

Carshigii Jamaalka

Ma cawaa ma caanaa
Ma ciirtaa ma calaf baa
Ma cuq baa ma cigashaa
Ma cisaa ma culuq baa
Ma daruur gu' curatoo
Cir caddaad an noqon baa
Ma cigaalka feleggiyo
Cirjiidkii mariiqaa
Ma magool cusayb baa
Ma cadceed arooryoo
Falaadhaha casuustaleh
Ku cabsiisay dheeggoo
Ceeryaantii didisaa
Ma xareed is celisaa
Ma habeen cadda ah oo
Balliyada cigaagani
Casuumeen xiddigahoo
Sida camal muraayad ah
Cirka dayaxi kaa jiray
Dhulka kaa cawaray baa
Cosob rayska xaadhiyo
Ma gargoorkii ceegoo
Calyayada barkaday baa
Alla sama cuddoonaa
Udugaa carfoonaa
Samsam caynka loo dhigay
Citibaaro badanaa
Calle ma aha liiti ah
Habac maaha ceebaleh
Qallef maaha camal ba'an
Coon maaha loo hoyan
Baali maaha caaryaleh
Cirir maaha toomama
Cawro maaha socod badan
Cayil maaha laga dido
Caatana u may bixin
Cid kastaba u geeyoo
Meel laga canaantiyo
Cillad loo ma heli karo
Cabdiyow tallaabada
Cutiyaan idhaahdaa
Timahay caweyskii
Cirifyada u saartee
Ku cayaara leydhee
Haldhaayaduna cawryaan
Indhaheeda cawsha ah
Mus cideedka midabka ah
Sanqadhoodhka caynaba
Timaheeda culayga ah
Ciridkeeda dhuxusha ah
Ilkahaa caddaanka ah
Camankeeda xaaddaleh
Dhexda caara dhuubta ah
Cududaha garaaraha
Kubabkay u culustahay
Cambarshaha sudhkeeday
Firirsheen cabbaaryadu
Waa Xuur al-Caynoo
Kolba anigu tin iyo cidhib
Cad aan quudho kuma arag
Cagfudayd u may dhalan
Cadho lagu ma sheegeyn
Waa canaadi lama odhan
Carrabkeedu beentiyo
Ma yaqaano caydaba
Wax ka cawda maan maqal
Ma cod dheera waa gabadh
Xishood baa u caado ah
Cimri waa u gaban weli
Caqli waa u waayeel
Cidhib baanay leedahay
Aniguna ma caasiyo
Cadraddii ammaan lehe
Carshigii jamaalkaan
U caleemo saaraye
Adna cadar Hadraawow
Hambalyada u soo curi

Ma Salguuro Caashaq
Ma salguuro caashaqe,
Ani sibiq ma igu yidhi?
Intuu samada ila tegey
Saxar-qaadka fooraha
”Dul-sabbee!” ma igu yidhi?
Dhalanteed ma igu sabay?
Soojeede maqan oon
Seexannayn ma iga dhigey?
Ma salguuro caashaqe,
Ani sahal ma igu heley?
Intuu soortii iga jaray
Suun adag ma igu xidhey,
Ma i saaray heegada?
Wax sanceeya ma u la’ay
Saaka maygu weynyahay?
Suxullada ma ii dhigey?
Ma salguuro caashaqe,
Ani salow ma igu ridey?
Sambabbadiyo feedhaha
Intuu surimmo kala baxay
Ma ku soofay xididdada?
Seediyo lafaha iyo
Wadnihii ma sarayoo,
Halistii ma suranyahay?

Maxamed Xaashi Dhamac ‘Gaariye’ in media

Search