Siyaasad

Sagaal midab baan arkaa, Siddeed magac baa ku xiga, Soddon hadal baan maqlaa, Siddeed iyo toban af iyo Saddex iyo toban wajoo Saantoodu madowdahoo Sidaa u wareegayoo Silloon baan eegayay. Waxaan ma siyaasad baa? Subxaanyaa laga matalay; Intaa way soconaysaa Sal iyo baar bay xushaa Dadkay kala soocaysaa Wax bay soofeeyneysaa, Intaa salaggay martaba Sun bay ku afuufaysaa. Wanaaggay saluugsantahay Samaantay ka dhiidhidaa Xumaantay saaciddaa Beentey saaxiib la tahay Qabiilkay la seexataa Sirrow bay weheshataa Sagsaaggay aammintaa Mid saaqiday bay tustaa, Siduu u danaysan laa. Saciimkay ka leexataa Waxay sarriftaa sharciga Caddaaladday seegantahay Xaqsoorkay suus ku tahay Sinnaantay cudur ku tahay Dulmiga inuu sare maro Bay sallaanka u toosisaa Eex bay ka sameeysantahay. Siyaasaddu waa labee; Middeer Soomaaliyeed Sideedaba waa nuxuus. Dadkii wada suubbanaa Ayuun bay sabab ibleys Mar qudha ku dhex sayrisaa, Markuu dhiig wada sunsumo Iyadu subag buu u yahay, Safayn goortay noqdaan Sarriib bay qaadataa Surgooyada laysu dhigo, Naf iyo ruux la sugo ‘Sidiinnii u sii waday' dhahdaa ‘Saacaddii kastaba!' Sedkooday qaadataa Saadkooday iibsataa Sawdkooday ku hadashaa Santuuqyay buuxsataa, Wixii seefo iyo quryo ah Wixii sulub dhici lahaa Si fudud bay ugu gaddaa, Sidee loo joojiyaa? Ujeeddadu waa sidaa. Siyaasaddu waa labee; Middeer Soomaaliyeed Sideedaba waa nuxuus. Qofkii samir iyo dulqaad Ku sugan bay colaadisaa, Midkii salfudeedka neceb Saf bay u kireeysataa Inuu sandulle ugu kaco. Silsilad bay daadisaa Siriq iyo dabin bay dhigtaa, Haddii aanu surinka gelin Sagsaagga ka daacad yahay, Xumaanta ka saafi yahay Ka saahido saar ibleys, Midkaasaa samatabbaxa, ‘Sirroow, ma hodmaa' la yidhi. Siyaasaddu waa labee; Middeer Soomaaliyeed Sideedaba waa nuxuus. Fal iyo sixir bay dhashaa Sarciyo cudur bay dhashaa Sun iyo boog bay dhashaa Sakiimmo af lay dhashaa Mindiyo sarayay dhashaa, Mid aan sedku deeqinoo Sibraarro watay dhashaa, Sakhraan daran bay dhashaa Saqiirro xun bay dhashaa Sawaad durey ah bay dhashaa Saxar iyo dembi bay dhashaa Belaayo soke bay dhashaa Subaacyo shishey dhashaa Sas iyo halis bay dhashaa, Dadkay sakaraadisaa Wax bay sinji doorisaa, Wixii seeddi iyo abti ah, Sokeeyaha wada dhashay, Saaxiibkay kala dhishaa. Siyaasad wixii yaqaan Caloosha wuxuu ku sido Haddii uu sari lahaa Ama uu saafsaafi laa, Wixii soonaha ka dhow Dadkuba wuu suuxi laa. Wixii seeraheeda galaa; Wax baa la saynsaabayaa Sarbeeb buu riixayaa, Isagu sogordaha gurracan Wuxuu ku saleeynayaa Inay saxan tahay middan. Su'aashuu diidayaa, Isagoon hadalkaaga sugin Haddana laba sikin dhexdood Wuxuu soo celinayaa Mid aadan siddiqi karayn. Sallaafi iyo waalli buu Qarhaysta u saaran yahay, Si buu wax u eegayaa Seenyaaluu bixinayaa Gacmuhuu sayrsayrayaa Wax buu suuradinayaa, Wuxuu saadaaliyaa Middii loo soo sajalay. Maxay sawir muujisaa Saxiix maran qaadataa Qoraallo sameeysataa, Waxaa ummad laysa sudhay Ayay sababtoodu tahay Haddana sahal moodayaan. Daacadi way samatabbixi, Sigtaa waa nabad galaa, Samraa waa helaa sedkii, Sagsaag waa khasaarayaa, ‘Sirrow ma hodmaa' la yidhi.