Hareeraa adduunka, Dab baa ka holcaaya
Hub baa ka qarxaaya, Hed baa ku baxaysa
Kuwaa herdamaya Habeen iyo maalin
Kuwaa biya hoostood Haraati is yeela
Kuwaa isku hiifa Siyaasad hagoogan
Kuwaa hardafaaya Kuwaa halgamaaya
Kuwa holinaaya Kuwaa hadimaya
Kuwaa haqab beela Kuwaa hunga taagan
Haybtiisaba Aadmi Dadnima ka huleelye
Hagardaamo Adduunka Dad Maxaa kala haysta
Hareera Adduunka Hormuud talinaaya
Hagaas daba jooga Aqoonta Habowday
Hub geri samaysa Hadmaa laga waayi?
Haddmuu sacu dhiiqay Hadhuub caana dhiiga
Sabuulka hadhuudhka Rasaas laga hoobshey?
Kuwa cudur heeray Hamuun iyo gaajo
Aqoon daro haysa Kuwa Hagranaaya
Kuwaa halal beerta Kuwa u habaya
Kan haysta shidaalka Heehaabka sabbaynta
Hindisaa addunka Dad maxa kala haysta!
Hareeraa Adduunka Baqaa ka huraaya
Habaaska daluumay Dadbaa isku haysta
Haddad u garsoorto Runtii helimaysid
Hiddii Afrikaanka Durbaaki Hadlaayey
Halaanhalka ciilka Codbaa ka hugmaaya
Halyeyada koonfur Hankoodaa la quudhay
Horaa bari dhexena Huqdaa loogu beeray
Haddaa geeska barina Loo soo hanqaltaagey
Haybtiisaba Aadmi Dadnimo ka huleelye
Hagardaamo adduunka Dad maxaa kala haysta
